بقلم د /ولاء عباس
فى كتير من أولياء الأمور فاكرين إنهم كده بيربوا أولادهم لمجرد إنهم بيأكلوهم ويشربوهم ويلبسّوهم ويوفّروا لهم كل حاجة بيطلبوها. بس الحقيقة إن ده اسمه رعاية مش تربية.
الرعاية إنك تخلّى ابنك يعيش مرتاح جسديًا…
إنما التربية؟
دى حاجة أعمق وأكبر بكتير… التربية إنك تخلّى ابنك يعرف يعيش يعرف يفكر يحس يختار الصح يتعامل مع الناس يكون إنسان سوي من جواه مش بس منظره حلو من برّه.
اللى بيحصل النهاردة إننا مشغولين طول الوقت نحقق طلبات أولادنا… عايز موبايل خده، عايزة لعبة، اتفضلى… طب والأخلاق؟
طب والمبادئ؟
طب والحوار؟
طب والوقت اللى نقعد فيه معاهم نسمعهم ونفهمهم؟
المشكلة مش فى الولاد… المشكلة فينا إحنا الكبار
كتير من مشاكل الجيل ده سببها غياب الحاجات اللى المفروض الأب والأم يزرعوها من وهم صغيرين: الأمان الاحتواء الحنية الحزم الاحترام القيم…
مش كفاية نقولهم اعملوا كذا وما تعملوش كذا إحنا لازم نكون قدوة لما يشوفك بتحترم الناس هيحترمهم
لما يسمعك بتقول الحقيقة هيتعلم الصدق
لما يشوفك بتغلط وبتعتذر هيعرف إن الاعتذار مش ضعف
الأب مش بس اللى بيصرف والأم مش بس اللى بتطبخ وتنضف
الأب والأم هما اللى بيشكّلوا شخصية إنسان
وبيسيبوا جوه قلبه بصمتهم اللى هتعيش معاه طول العمر
فكروا كده…
إنت عايز ابنك أو بنتك يبقوا إيه بعد 10 سنين؟
ناس بتحب نفسها وتحترم غيرها؟
ولا ناس تايهة ومش عارفة هى مين؟
التربية مش رفاهية
التربية أمانة
ولو إحنا مأمّنين على أولادنا فى إيدينا… يبقى لازم نربى مش بس نرعى.
