بقلم د /ولاء عباس
عشان اللي حصل ياسين مايتكررش.
اللي حصل للطفل ياسين كسر قلب كل بيت وكل أم وكل أب. مش بس لأنه طفل، لكن لأنه ابن كل واحد فينا، القصة دي لازم تكون جرس إنذار لينا كلنا،لازم نوقف، نفكر، ونعيد حساباتنا.
لازم نسأل نفسنا: إحنا قد المسؤولية؟ بنسمع ولادنا؟
بنشوفهم فعلاً؟
ولا مركزين فى تفاصيل الحياة ونسينا أهم حاجة فيها: أمان أولادنا النفسي والجسدى؟
أولاً: لأولياء الأمور
1. اسمع ابنك كويس
كتير من الأطفال مش بيعرفوا يعبروا عن اللي جواهم بالكلام، لكن بيكون عندهم إشارات وسلوكيات لو لاحظناها هنفهم لازم يكون عندنا صبر نستمع، من غير تسرع أو أحكام.
2. ما تسخفش من مشاعره
لو ابنك قالك إنه زعلان من صاحبه، أو خايف من المدرسة، أو قلقان من الامتحان، خده على محمل الجد،لأن الشعور اللى شايفه صغير ممكن يكون حمل كبير عليه.
3. تابع تصرفاته وتغيراته
التغيير المفاجئ فى سلوك الطفل، سواء انعزال، خوف، كوابيس، أو عدوانية، بيكون أحيانًا صرخة غير مباشرة للمساعدة.
4. ما تسيبش ابنك لوحده في معركته
واجه معاه، افهم المشكلة، واحتويه وجودك جنبه بيقويه، وغيابك بيوجعه.
5. تواصل مع المدرسة والمعلمين
اسأل، تابع، وافتح خطوط التواصل مع المدرسة اعرف مين صحابه مين بيعامله كويس، ومين بيأذيه حتى لو بكلمة
ثانياً: لأولادنا الأعزاء
1. اتكلم لما تتضايق
لو في حاجة مضايقاك، ما تكتمهاش جواك. روح لماما، لبابا، لأي حد قريب منك وقلّه فيه ناس بتحبك ومستعدة تسمعك.
2. ما تسكتش لو حد ضايقك
سواء كان صاحبك، مدرس جار أو حتى حد من قريبك، حقك تكون مرتاح وآمن واللي بيأذيك مش طبيعي ولا مقبول.
3. اختار أصحاب يحترموك
الصاحب الحقيقي هو اللى يسمعك، يشجعك، وميأذيش قلبك. متجريش ورا اللي مش بيقدّرك.
4. ساعد غيرك لو شفته بيتأذى
ما تسكتش، حتى لو بالكلمة، أو إنك تبلغ حد كبير ممكن تكون سبب فى إنك تنقذ حياة حد.
وفى الآخر...
أمان الطفل مش مسؤولية شخص واحد، دي مسؤولية مجتمع كامل. مسؤولية البيت، المدرسة الجيران وكل شخص حوالين الطفل، كل طفل محتاج حب، احتواء، أمان وحد يسمعه بصدق.
اللى حصل لياسين لازم يفضل في قلبنا، مش عشان نحزن لكن عشان ما نسمحش إنه يتكرر. خلينا نحب ولادنا صح، ونسمعهم بجد 
ونقف جنبهم دايمًا.
ونقف جنبهم دايمًا.
عشان اللي حصل لياسين... مايتكررش تاني أبدًا.
سلسلة ازاى نربى صح
د ولاء عباس
دكتوراة صحة نفسية
