بقلم / رضا السعيد
كفر الشيخ... الأرض بتصرخ ومحدش سامع
في محافظة المفروض إنها تكون "سلة الغذاء" لمصر، بقت الزراعة فيها بتعيش على أنفاسها الأخيرة. كفر الشيخ، اللي كانت بتفخر بالفدان، وبالمزارع اللي بيغنّي وهو بيحرث، بقت دلوقتي بتشوف المزارع بيبكي على أرض مش قادر يصرف عليها.
البيروقراطية اللي خنقت الاستثمار، هي نفسها بتخنق الزراعة. ورق على ورق، ومشاريع بتتأخر، ودعم مش واصل، ومية بتقل، وتكلفة بتزيد. والمزارع؟ واقف في النص، لا عارف يزرع، ولا عارف يهاجر.
في بلد بتستورد أكلها، لازم نسأل: إزاي كفر الشيخ، بكل الأرض دي، بكل العقول دي، بكل الشباب اللي نفسه يشتغل، لسه بتعاني؟!
الري الحديث لسه مش واصل لكل الأراضي. الإرشاد الزراعي بقى ورق أكتر منه علم. أسعار الأسمدة نار، والتسويق عبء، وسعر المحصول بيتحدد من غير ما حد يسأل المزارع.
الحل مش مستحيل. لكنه محتاج إرادة. محتاج نعيد ترتيب الأولويات. نعمل بنية تحتية محترمة، نوفّر مياه، نفعّل الجمعيات الزراعية بجد، ونربط الزراعة بالصناعة عشان الفلاح يزرع وهو مطمئن إنه هيبيع.
كفر الشيخ تستاهل تكون الأولى. مش بس في الإنتاج، لكن في التقدير والدعم والتخطيط الذكي.
"كلام في الصميم" النهاردة من قلب الأرض... من صرخة الفلاح اللي مش لاقي غير الورق والوعود.
